Makaluuy in manga kataymanghuran taniyu simud pa Sabah nagda sinapang. Way mahinang taniyu manga Tausug ha Sabah malaingkan tahan imiyan:
"Mayta' basab kamu manga taymanghud nag hinang bihaini, di' ka mapikil niyu in manga kami di haini nag uusaha malapay sin hinang niyu yan? Bihaun in manga bangsa ta niyu ha Sabah way pass way katarrangan naguusaha maraw yaunna iyapas tiyukud nakalamud ha manga simud nagdara sinapang yaun ha Lahad Datu. Andu' isab manga taymanghud, mayta' baha'? Asal bunnal di' kami makasandal bang sawpama awun bangsa namu' puhingaun bunuun sin hambuuk hula' ha bukun hak sin hula' yaun mamunu' ha bangsa namu'. Sagawa' bang isab kita' namu' in kamu (bangsa namu' da) halaum kalaungan iban ha bukun hak niyu simud pa lugal ini danan biyunu' kamu, asal tuud way mahinang namu' malaingkan dumuwaa pa Tuhan ha supaya in kami di haini di' malapay sin kalaungan niyu...."
Kitaa niyu ba manga taymanghud unu in kiyakitaan namu' in kamu simud palaum Lahad Datu nagda sinapang halaum kalawngan:
- 1: Mayta' kamu simud palaum Sabah nagda sinapang nagusal ngan sin Sultan KIRAM? (misan unu na ngan sultan bang KIRAM da). Way niyu kiyaingatan in KIRAM katan nagdara panji sin Philippines? Kitaa niyu ba in Family KIRAM yan katan taga Passport Philippines hangkan in panji sin SULTANATE nila yan iyaabayan sin PANJI PHILIPPINES. In panayma' sin Malaysia bukun indiyara niyu Sultanate of Sulu sagawa' Sultanate of Philippines, in nakurah niyu hi Jamalul Kiram III, in nakura' hi Jamalul Kiram III amuna in presiden Philippines. In guwa' niyu miyari kamu nagda sinapang pa Sabah in kamu FILIPINO bukun Tausug raayat sin Sultanate of Sulu sabunnal. Karna' in Sultanate of Sulu bukun sakup sin Philippines, sabab in Philippines hamba raayat sin King Philipp II Spanyol Kastila'. Pangasubu kahnu in Tausug iban Sultanate of Sulu naraug sin King Philipp II?
- 2: Simud kamu nagda sinapang in maksud magtuntut sin SABAH dahun magbalik pa lauman sin Sultanate of SULU? Na lawng tuud ini manga taymanghud, ayaw niyu kami dahun pakalawngan, in panghati namu' di ha Sabah in kamu yan Filipino sabab in Sultan niyu Filipino, tuntutun in Sabah dahun pa Philippines.... unu na in kasuddahan bang in Sabah duunda ha Philippines? In guwa' mahinang da in bangsa ta niyu majuljana' pamarintahan naisab sin manga Tausug politisian kurakut (bukun sab katan) biya' sin manga nag happen ha Sulu bihaun. Way mabaya' Tausug di ha Sabah guyurun maun pa Philippines in Sabah. Makuyag pa sila in Sabah pamarintahan sin Malaysia. Magmaaf kamu manga taymanghud way lamud namu'.
- 3: Nagiyan kamu in diyara niyu Sultanate of Sulu Sabunnal amuna hi Jamalul Kiram III... pangasubu kahnu si yan kila namarinta sin SULU? Laung niyu sabab sin siya na yaun in nakasud palaum 9 Hiers sin Padjakan Sabah 1878? Pangasubu namu' kahnu hi Kiram yan siyulat duun ha 9 Hiers yan hinang Sultan Sulu? Way niyu kiyaingatan hi Judge CFC Makaskie ha tahun 1939 namaita' in sila yaun 9 Hiers hat sadja WARIS sin bayad 5,300 sin Sultan Jamalul Kiram II. Bima'na way Sultan Sulu duun. In maksud hi Judge Makaskie "Way na Sultan Sulu ha panaymai nila bat naman in Sabah makapuklas daing ha KIRAM". Hangkan way nila recognise daing 9 family yaun misan hambuuk Sultan Sulu... in kaaunan ha susungun masa in 9 Hiers yaun sumakat katan mahinang SULTAN SULU. Amuyaun in maksud sin Judge CFC Makaskie bat in manga karatuan malawa' na ha sayu. Kalawaan raayat magagaw naman magsultan sin baran put mayan yaunda halauman sin Philippines imiiyan "Kami na ini manga KIRAM in PINOY sabunnal". Nalawa' in pagka citizens sin Sulu kanila nahinang Filipino, hangkan yan hisiyu in magad ha KIRAM yan katan makasud halaum kalawngan. Wal 'iyyazubillah!!
Hangkan mainu inu sakamu bang mayta' in manga Tausug ha Sabah way miyagad sin pagiyanun niyu MAGTUNTUT SIN SABAH yan ha sabab sin 3 parkala' ha taas yaun. Awun sarah niya manga taymanghud magsalassay sin kahalan ini. bang ini kaabutan sin pikilan sin manga taymanghud taniyu manga KIRAM yan insyaa Allah in SULU mahinang hambuuk hula' magbalik. Bukunna Filipino... hati niya Sultanate of Sulu na magbalik.
Ingatun taniyu in Sabah yaun napadjak salama AWUN BULAN IBAN BITUUN. Bulan amuna in Sultan Sulu, in Bituun amuna in namadjak (Anggalis/Malaysia). Salama in MALAYSIA KIMILA HA SULTANATE OF SULU tagdapu sin Sabah iban mabaya' pa mamadjak, salama yadtu ra isab in way mahinang sin Sultanate of Sulu way hak niya kumawa'. Amurakuman pagisunan bang pila in bayad sin padjakan hitukbal sin Malaysia hapagisunan dakuman magtantu ha bissara maraw. iban in manga Tausug manjari na sumud guwa' sin Sabah way na pagsaggaw paghalaw, sabab biyutang halaum konteks sin Padjakan North Borneo 1878 in manga hamba-raayat sin Sultanate of Sulu di' manjari langun magsud guwa', bang saupama makadusa in raayat sin Sulu subay sila hukuman sin pamarinta namadjak. Amuyan in biyutang halaum Nusulan (History).
Di' kimila in Malaysia ha Sultanate of Sulu bang in kaabutan Filipino ra in naggugulal SULTAN SULU. Kitaa niyu ba in Sultan Bantilan II yaun ha SUG nagpatindug panji sin Sulu Sultanate (SSDI)... way iyaabayan sin panji Philippines. Independen, di' yaun kahukutan sin sara' (LAW) sin Philippines sabab bukun sila Filipino. kitaa niyu hi Jamalul Kiram III yanna iyantupan saggawun sabab kiyugdan siya sin sara' sin Philipines as FILIPINO.
MANGA TAYMANGHUD karina kamu tumaayun pa Sultaniyah Sulu Darul Islam (SSDI). In kita niyu Tausug asal independen, way na Filipino daing pa ha jaman kastila' sampai sakarang pa ini ini in kita niyu mahardika'. Magbalik batang sadja kita niyu manga taymanghud. Karina kamu KIRAM, Shakirullah, Harun Al-Rasyid, Pulalun, manga politisyan Tausug, manga MNLF manga Abu Sayyaf, manga Buranun, manga Yakan pa bangsa Sama, Badjau, manga Kagayan manga Kalibugan-Subaanun sasuku' sin sakup sin Sultanate of Sulu maghambuuk kita niyu ha panghati bunnal. MAGPATINDUG MAGBALIK SIN DARUL ISLAM SULU taniyu kalasahan way na FILIPINO.
